RESUMO DO XOVES E O VENRES

     Xa rematamos outra semana máis. O tempo voa! E, claro, como estamos tan ocupados non temos tempo de aburrirnos nin un segundo. Agora ides ver varias cousiñas que estivemos facendo onte e hoxe.

    Por suposto, tivemos dous novos Willy Fog na aula. O xoves foi Izan e o venres Marcos. Os dous tiñan moitas ganas de ser os protagonistas, pasar lista, axudar á profe a repartir o material ou as merendas e, o máis importante, ir de primeiros na fila. Todos os compañeiros/as felicitaron a Izan  e Marcos por pasar lista requetebén.

          Xa rematamos a nosa versión de "Cala amarela" de Georgia O´Keefe e xa está colocada á beira das "Amapolas" da mesma pintora. Agora teremos que pintar outras dúas obras de arte para colocar nos outros dous espazos libres do marco que temos preparado e, finalmente, colocar a nosa montaxe no corredor de infantil, o noso museo particular. 

         Eu non sei o que pensades vós, pero eu estou abraiada con estas pinturas. Aínda que eu lle dou uns pequenos retoques finais, teño que dicir que estes nenos e nenas están poñendo moito entusiasmo nestas actividades e os resultados son espectaculares. Estamos traballando moitas cousas mentres pintamos: a teoría da cor, a concentración, a observación, a memoria visual, o control grafo-motriz e a coordinación óculo-manual, o afán de superación, o sentido estético, a organización e percepción espacial... Felicitade aos peques polos resultados obtidos e, sobre todo, por ter ganas de participar e facelo con entusiasmo e sen medos.

        Como temos moitos libros de arte na aula, organizamos unha mesa especial para eles. Así cando queremos disfrutar dalgún deles é máis doado collelo e logo volvelo a poñer no seu lugar. Os pementeiros/as disfrutan moito "lendo" estes libros.

    Aínda están chegando máis cousas para o noso recuncho do proxecto, ou para o corredor. E, casualmente, os dous "Alejandros" da clase trouxeron cousas: Alejandro Vázquez Rodríguez trouxo outro móvil (que aínda non colguei) cunha foto do modelo que seguiron para facelo.¡Quedoulles fenomenal! E Alejandro Vázquez Seco trouxo uns preciosísimos tulipáns holandeses que me encantaron; puxémolos en auga e están no noso recuncho para que todos poidamos disfrutar das súas cores e o seu aroma.

     Tamén fixemos e pintamos unha nova silueta como as de Keith Haring para colocar no teito do corredor. Esta vez o neno encargado de facer de "plantilla" para o silueteado foi Anrís que estaba todo contento alí tumbado no papel branco.

Agora temos que colocar todas as siluetas que fixemos en infantil (os nenos da Sementeira e do Paseo do Espolón tamén traballaron moito e xa temos unha boa colección de siluetas de cores chamativas) no noso corredor. Algunhas xa están colocadas e o aspecto da nosa entrada vai tendo esta pinta tan pop.

       E, antes de rematar esta entrada, non podo esquecerme de compartir as fotos dos pementeiros que escribiron o seu nome na PDI onte e hoxe. Dígovos que estou impresionada coas ganas que teñen de facelo, non fan máis que insistirme en que queren poñelo e hoxe, sen ir máis lonxe, ía facer outra cousa antes de saír e cambiei de idea. Se queren escribir o nome, pois a escribir o nome!

E agora si que remato cun vídeo. Aquí están estes peques cantando "How´s the weather", unha canción en inglés que lles gusta moito e que interpretamos todos os días cando facemos o panel e observamos que tempo fai fóra.

     Eu remato esta semana completamente satisfeita con todo o que traballamos e feliz porque estamos disfrutando moito no cole. Agora toca pasalo requetebomba o finde!!!! Ata o luns!