XORNAL E IOGA

       Os venres temos sempre moitas cousas que facer porque toca elixir o libro do pasaporte lector, facer ioga e, ademáis, moitas outras actividades como calqueira outro día da semana. Hoxe tivemos un día axetreado de verdade pero ao final, máis ou menos, conseguimos, facer case todo o que estaba previsto.

    Para empezar, unha das cousas que rompeu a rutina diaria foi o feito de recibir o primeiro número de NOVAS DE INFANTIL do curso (e que xa é o cuarto exemplar que entregamos ás familias). Os pementeiros/as puxéronse tan contentos que ata levantaron un pouquiño de máis a voz e tiven que chamarlles a atención. ¡Ás veces é difícil controlar o entusiasmo, que parece que se manifesta mellor berrando! Pero, en fín, polo menos o que me queda é pensar que se emocionaron co xornal.

   Como os ánimos estaban un pouco exaltados, decidimos que era o momento de relaxarnos un pouquiño facendo ioga. Hoxe coñecemos e practicamos unha nova ASANA, a da TARTARUGA.

     Primeiro estivemos lendo a historia de SUPTA KURMA-ASANA: vendo que o Monte Mandara se ía afundindo a falta dunha boa base, o deus Vishnu converteuse nunha enorme tartaruga que, mergullada baixo o mar, sustentou  o monte. A tartaruga era moi forte, o monte moi elevado e para que todo estivese perfecto e ben estable, o deus Vishnu decideu convertirse tamén en águia e sentouse sobre o cume do monte Mandara para fixalo sobre o caparazón da tartaruga.

   Como vedes é unha postura ben difícil, aínda que hai algúns pementeiros/as ben flexibles que a fan perfecta e iso que só a practicamos unha vez. A ver quen se anima a practicala este fin de semana.

    E, finalmente, a relaxación plena facendo un perfecto hexágono. ¿Qué vos parece esta figura? A este grupiño saiulles xenial, a verdade.

¡COMO MOLA EXIPTO!

Eu non sei o que ten Exipto pero a todo o mundo lle gusta. As paisaxes cheas de area e grandes monumentos como as Pirámides ou os templos e a Gran Esfinxe, o río Nilo, os xeoglíficos e os faraóns e raíñas que, como Tutankhamon ou Nefertiti, están cheos de misterio. O caso é que Exipto ten moitas cousas que nos interesan.

Fai uns días unha avoa dun pementeiro dicíame que no xornal nunca saía unha noticia sobre África. Así como no proxecto anterior, sempre atopaban algo sobre o Universo, este ano non había maneira. O domingo, lendo os periódicos, apareceu a noticia de que na tumba de Tutankhamon hai unha cámara escondida, na parte norte, que algúns investigadores pensan que pode conter o sarcófago da raíña Nefertiti. Nese momento pensei para min: " Espero que algún pementeir@ vexa  esta nova e a traia ao cole". E así foi, dúas señoritas moi contentas trouxeron o recorte do xornal coa información e, entón, algúns outros tamén contaron que o viran no telexornal.

E, como a cousa vai de Exipto, pois tamén vos mostro o que nos trouxo Mariña (que lles gustou moito a todos): Un papiro exipcio e... ¡area do deserto recollida ao ladiño dunha pata da gran esfinxe!

Aquí está a nosa exposición de debuxos exipcios.

E aquí a nosa entrada de infantil que, tamén, se está poñendo bastante exipcia. Primeiro medraron unhas palmeiras e, despois apareceron unhas pinturas.

Como vedes, en infantil sempre temos moitas cousas que contarvos. Aproveitade na casa para seguir disfrutando con estes temas tan interesantes. Os máis pequenos chegan moi contentos cando aprenderon algo novo convosco. ¡Aproveitade eses momentos nos que vos mostran interese e curiosidade!