CALA AMARELA

     Chegou o luns e empezamos a segunda semana de febreiro cun novo Willy Fog. Hoxe foi o turno de Daniel que estaba feliz co seu cargo de axudante da profe. Despois de facer o panel moi ben, os compañeiros/as quixeron felicitalo cun forte aplauso.

 

     

    Tras finalizar o panel, lemos un bonito conto sobre o cadro "O matrimonio Arnolfini" de Jan van Eyck. O libro titulado "Jan estivo alí" conta a historia dun neno, o fillo de Van Eyck, que acompañou ao seu pai cando visitou a elegante casa do señor Arnolfini para pintar o momento da súa voda. O fermosísimo cadro representa dita celebración.

    A continuación rematamos unha tarefa que xa empezáramos a semana pasada, colocando papel celofán de cor azul, verde e vermello  nuns círculos que os pementeiros/as picaran co punzón previamente. Quedou moi ben e a todos lles gustou moito porque podían mirar a través do papel, como se foran unhas gafas, e vían todo diferente coas cores do celofán.

     E para rematar o día pintamos un pouquiño na nosa nova obra de arte. O venres comezamos a pintar outra flor das de Georgia O´Keeffe, "Cala amarela". A obra orixinal é esta:

     E aquí están as fotos dos pementeiros e pementeiras traballando.

      E, por último, para rematar esta entrada, teño que poñer a última aportación que chegou para o recuncho do proxecto. Alejandro Vázquez Rodríguez trouxo unhas fotografías das Pirámides de Giza e a Gran Esfinxe. Estaba tan contento que xa casi non era capaz de explicar o que traía, con tanta emoción.