PESANDO E PENSANDO

Hoxe na Pementeira foi un día de investigación. Aproveitando que os Reis Magos de Oriente nos trouxeron unha balanza estupenda que podemos empregar tanto con sólidos como con líquidos, decidimos que íamos empregar o día en pesar boliñas de plastilina.

O reto consistía en facer boliñas de plastilina que pesaran 10 gramos.

Primeiro estivemos vendo como podíamos averiguar canto pesaba unha bola de plastilina empregando as pesas e a nosa balanza nova. Tíñamos que reflexionar sobre si a bola pesaba máis ou menos que a pesa de 10 gramos e, como consecuencia, tíñamos que averiguar o que había que facer se a balanza se inclinaba cara un lado ou cara outro... ¿habería que quitar plastilina da bola ou habería que poñerlle máis?

Despois de pensar todas esas cousas colectivamente, cada neno/a tiña un reto individual:

*Conseguir facer unha bola de plastilina de 10 gramos.

 


Ao final, moitos nenos e nenas conseguiron facer bolas de 10 gramos. 

Todas estas pesan exactamente o mismo.

Seguiremos facendo investigacións coa nosa balanza porque penso que esto dá para moito. Teremos que averiguar canto pesan dúas ou tres bolas xuntas, ou se unha bola do mesmo tamaño que ás de plastilina pero doutro material (coma o plástico, por exemplo) pesa igual ou non... En fin, temos moitas averiguacións que facer.

¡Grazas Melchor, Gaspar e Baltasar! Penso que imos disfrutar moito con este estupendo agasallo.

OS REIS MAGOS PASARON POLA PEMENTEIRA

Hoxe pola mañán, nada máis entrar na aula, atopei un montón de apquetes. Non quixen tocalos porque, a verdade, pensei que seguramente serían agasallos que os Reis Magos deixaron na Pementeira para todos os nenos e nenas que voltaban das vacacións de Nadal.

Cando entraron todos os pementeiros/as na aula, a verdade é que non levaron moita sorpresa. Algúns mesmo pensaron que os Reis se equivocaran e eses paquetes non eran para deixar aquí, pero cando lles dixen que se non eran para nos, non podíamos abrilos e tíñamos que buscar aos seus donos, decidiron que seguro que os Magos, ou quizá Papá Noel, querían deixarnos algo para ter na aula (aínda que tamén é certo que, máis de un preguntou se os podían levar para a casa). Eu penso que esa era a realidade. Os Reis Magos sempre procuran deixar algunha cousiña interesante nos sitios onde os nenos pasan moito tempo, xa que a eles lles gusta que estén xuntos e aprendan e disfruten.

Así que, unha vez resolto o misterio tocaba abrir os agasallos. ¡Mirade que sorpresas máis requetechulis!

Despois de merendar, como tíñamos gardadas algunhas cousiñas da festa de antes de vacacións, os nenos e nenas que quixeron poideron tomar un cachiño de turrón, unhas trufas ou uns mazapáns.

Con todo isto, penso que o primeiro día despois das vacacións de Nadal non estivo nada mal, verdade?