Cada día coas lecturas que facemos e coas charlas que temos nas asambleas xurden novas preguntas e temas para investigar. Onte estivemos lendo a historia de Orfeo e Eurídice e descubrimos que Orfeo, o protagonista deste relato mitolóxico, era fillo de Calíope, unha das nove musas. Entón eu preguntei aos pementeiros/as se sabían o que era unha MUSA e, claro, para eles Musa é a miña cadeliña a pequena, a filla de Troya (como vedes neste curso as miñas cadeliñas están moi presentes porque as dúas teñen nomes moi mitolóxicos)
Pero MUSA é un personaxe da mitoloxía grega que ten moito significado porque representa a inspiración dos artistas. As musas eran as 9 fillas de Zeus que cantaban e bailaban nas festas dos deuses mentres Apolo tocaba a cítara, e baixaban á terra para alimentar a creatividade dos artistas que, cando escoitaban as súas voces, realizaban as súas creacións poéticas, musicais, pictóricas etc.
Así que o novo reto foi investigar como se chamaban as nove musas e cal era a función de cada unha. E unha vez máis chegaron moitas respostas acertadas. ¡Así dá gusto! E alegreime de ver que Yeico tamén se animou a participar neste xogo dos retos. Pouco a pouco, xa sabía eu, todos os nenos e nenas se van animando a investigar porque comproban que o pasan ben, que é gratificante acertar a resposta, que é emocionante buscar e fantástico descubrir...
Antes fago o comentario, e antes mo di na casa.Chegou do cole e dime, mamá hoy quiero hacer el reto, vamos a buscar el nombre de las nueve musas de Zeus. E quedei un pouco descolocada...jejeje.Noraboa a todos, e en especial a Yeico.
ResponderEliminarEu tamén me alegrei de que participara. Cada vez que se vai animando un, é unha satisfacción para min. E, sobre todo, cando eles comproban que a resposta é correcta poñen tal cara de orgullo e lles sube a autoestima a tal nivel que iso é impagable. Espero que sigan sempre sentíndose ben cando aprenden algo novo, cando descubren cousas cos vos na casa, cando recordan información e a poden compartir cos demais...
Eliminar