RETOS

     Na Pementeira imos ter unha noca actividade durante este curso. É algo que sempre lles propoño aos nenos e nenas cando xa están na aula de 5 anos e, polo tanto, son os maiores de infantil. A proposta consiste en plantexar RETOS de vez en cando que non son máis que preguntas, adiviñas, cuestións sobre as que investigar, enigmas que descubrir... 

    O caso é que eu non vou avisar cando propoña un reto, nin no blog nin nas libretas de comunicacións. O que pretendo é potenciar hábitos de escoita nos nenos/as, motivalos a investigar, a ser responsables, quero comprobar a memoria que teñen e como vos transmiten as preguntas na casa... Non se trata de que as familias compitan entre elas, e espero que animedes aos peques a participar pero non para ganarlle a ninguén senón para disfrutar aprendendo  e descubrindo cousas novas e interesantes.

    O venres propuxen o primeiro reto. Como fixemos os novos equipos mitolóxicos e xa coñecemos a historia de Perseo e a de Obatalá, só nos faltaba coñecer quen era, onde vivía e que fixo o mago Merlín. E hoxe quedei ben contenta cando vin que Alex V.S. chegou co reto resolto: contounos a historia de Merlín e trouxo un libro que estivemos mirando e lendo con calma na asamblea. ¡Parabéns a Alex e á súa familia que lle axudou a buscar información! ¡Bo traballo!

 

    Así pois, hoxe coñecemos un pouco mellor a Merlín, a espada Excalibur e ao Rei Arturo e os cabaleiros da mesa redonda. Agora toca estar atentos para o seguinte RETO. Animade aos vosos peques a escoitar ben o que eu explico e pregunto na aula a ver se máis nenos superan retos e aprenden moitas cousas... 

    Tamén lle quero agradecer a Sara García que trouxo un bonito libro sobre mitos gregos... Algúns xa os coñecemos e agora temos que ir descubrindo outros novos.

   En canto ás cousas para o recuncho mitolóxico, non vos compliquedes a vida, seguro que hai moitas máis cousas das que pensades agora ao principio e podedes botarlle un pouco de imaxinación, seguro que na casa podedes facer algunha cousiña, quizá algunha manualidade coa que decorar o recuncho, quizá tedes algún obxecto que teña relación con algún personaxe mitolóxico, algún debuxo... seguro que pouco a pouco se vos van ocurrindo cousas. ¡Veña, papás e mamás, sorprendédeme!

     A ficha de hoxe foi obviamente sobre o Equipo Merlín.